БНХАУ Эверест уулыг нүхлэн төмөр зам барих хэлэлцээрийг Непалтай хийж байгаа талаар Бээжингийн албан ёсны эх сурвалж мэдээлжээ. Хятадууд Төвдийн нийслэл Лхас хотыг Хятадын мужуудтай холбосон тээврийн судлыг 4-5 мянган метрийн өндөрт хэдийнэ босгосон.Таван жилийн дараа гэхэд Непалтай хиллэх хил хүртэл дараа нь Непалын газар нутаг дээгүүр замаа өргөсгөх юм байна. Харин энэ төсөл нь Энэтхэгийн хувьд түгшүүр төрүүлж байна гэж шинжээчид үзэж байгаа гэнэ.Бээжингийн China daily сонины мэдээлснээр Непалын хүсэлтээр Лхасаас Непалын хил хүртэл төмөр замыг уртасгах төлөвлөгөөг авч хэлэлцэж байгаа бөгөөд энэ бүтээн байгуулалтыг 2020 он гэхэд дуусгана гэж төлөвлөжээ.Гэхдээ хятадууд үүгээр төлөвлөгөөгөө хязгаарлахгүй бололтой. Өнгөрсөн оны 12 дугаар сард БНХАУ-ын Гадаад хэргийн сайд Ван И Непалын нийслэл Катмандуд айлчлах үеэрээ төмөр замын шугамыг Катманду хот руу ч хүргэх боломжтой хэмээн мэдэгдсэн юм. Ингэснээр Хятад болон Энэтхэгийн асар том зах зээлийг холбох амин чухал шугам бий болох гэнэ.Гэхдээ энэ төлөвлөгөөг хэрэгжүүлэхийн тулд Эверест уулыг нүхлэн хонгил гаргах шаардлагатай юм байна. Хятадын шинжээч Ван Мэншугийн өгүүлснээр төмөр замын шугам Жомолунгмаг дайран өнгөрч, ажилчид маш урт хонгил ухах хэрэгтэй болно гэжээ. Гималайн байргүйгээс хамаараад галт тэрэг үе үе дээшлэх нөхцөл үүсэх тул Катманду руу явах галт тэрэгний дээд хурд нь 120км/цаг байх гэнэ.Ийнхүү Хятадууд асар том бүтээн байгуулалт  хийхээр төлөвлөж байгаа ч Британийн Guardian  сонин дээр гарсан хэлэлцүүлгийн дараа олон шүүмжлэл гарсан юм. Уул нүхэлж хонгил, зам тавих туршлага түгээмэл байдаг ч газар хөдлөх нөхцөл бүрдүүлж болзошгүй олон хүн үзжээ.Энэ талаар ОХУ-ын Алс Дорнодын хүрээлэнгийн эрдэмтэн Яков Бергер санал бодлоо хуваалцахдаа хятадууд уулан дээр нарийн ажиллагаатай инженерийн байгууламж бүтээж сурсан, түүний нэгэн жишээ нь Лхас хүртэлх, далайн түвшнээс  дээш 4-5 мянган метрийн өндөрт Цинхай-Төвдийн төмөр зам барьсан явдал хэмээн онцолсон байна.Энэ төмөр зам нь арилжааны гэхээсээ илүүтэйгээр стратегийн ач холбогдолтой гэдгийг эрдэмтэн онцолжээ. Түүнчлэн “үнэхээр Катманду хүртэл төмөр замын шугамаа өргөтгөх гэж байгаа бол энэ нь нэн тэргүүнд стратеги. Лхас хүртэлх зам ачаалалгүй, тэр замаар зөөх юу ч байхгүй. Нөгөө талаас цэрэг оруулах гэж байж болох юм” гэж таамаглажээ.Хятадын хэвлэл мэдээллийн хэрэгслүүд Гималайн шинэ төслийг Торгоны зам эдийн засгийн бүсийг бий болгох төлөвлөгөөтэй холбон тайлбарлаж  байгаа ч энэ төлөвлөгөө  Энэтхэгийн хувьд ихээхэн түгшүүр төрүүлж байгаа гэнэ.Хятад улс Пакистаны холбоотон, түүнчлэн Бээжин Непал, Шри-Ланк, Мальдивт хүчтэй нөлөөлөхийг оролдож байгаагийн дээр ингэснээр Энэтхэгийн тойрон нөлөөгөө тогтоон, “бүслэлтэд оруулах” гэж байна гэж Энэтхэгийн  томоохон улс төрчид мэдэгджээ.